2018年5月29日星期二

財路 [錢雋] 2018 05 29


哈電搵到新財路


哈爾濱電氣(1133)啱月頭創咗金融海嘯以嚟低位,每股現金值,講緊係現價3.4倍,誇張得很。
哈電到上年尾,揸現金161.6億元人仔,折約190.2億(港元.下同),連埋年頭完成向母企配發內資股集資15億元,家陣現金達到205億元,哈電家陣總市值得47億元,現金係市值4.4倍。以哈電上年年報資料做準,集團總借款約39億元,計計數,哈電家陣淨現金166億元,或每股9.7元,係哈電現價2.84元3.4倍!
哈電呢個月頭見2.22元,創咗08年環球金融海嘯以嚟新低,呢期小型反彈,亦唔係比海嘯價差得好遠。哈電股價差到冇譜,同集團上年業績倒退超過50%有關,但咁睇,哈電現價PB得0.25倍,比上市以嚟平均0.88倍,平咗近72%,喺電力設備股當中,冇邊隻夠哈電平。
開拓40個國家市場
又家陣內地講環保,棄煤電,加埋行供給側政策,咁嘅環境下,哈電業績唔靚仔,可以理解。
但哈電唔係坐以待斃,實行走出去搵財路,家陣集團包括火電、水電同核電配套、產品,已經出口到印度、俄羅斯、孟加拉等等40個國家。食住尤其一帶一路政策,海外市場逐步抵銷內地影響。
場內專業預測,哈電今、明兩年EPS0.192元,預測PE14.7倍,但到2020年,哈電突飛猛進,EPS0.337元,預測PE8.5倍,比上市以嚟平均PE17.2倍平過半。
炒哈電,以場內報告畀哈電目標平均價4.45元,哈電都要翻半番以上,PB都係得0.39倍。

沒有留言:

發佈留言